बेल्हे(वार्ताहर) कोरोना महामारीच्या पार्श्वभूमीवर गेल्या दोन वर्षापासून तमाशा फडांचे मालक व कलाकार देशोधडीला लागले असून प्रशासनाने बंदी ऊठविल्यानंतर(दि.२६/२७ नोव्हेंबर) बेल्हे येथे कै. संगितरत्न दत्ता महाडिक पुणेकर तमाशा महोत्सवाच्या माध्यमातून साईकृपा पतसंस्थेचे अध्यक्ष वसंत जगताप व त्यांच्या सहका-यांनी त्यांना सावरण्यासाठी मदतीचा हात पुढे केला व दोन दिवस आठ तमाशा फड मालकांनी आपली कला सादर केली व दुसऱ्या दिवशी संपूर्ण महाराष्ट्रासह परदेशातही आपल्या लावणीच्या माध्यमातून मराठी ठसक्याचा ठसा उमटवणारी,आपल्या अदाकारीने भल्याभल्यांच्या टोप्या उडवणारी लावणीसम्राज्ञी नटरंगी नार सुरेखा पुणेकर यांच्या बहारदार लावणीचा आस्वाद घेण्यासाठी बेल्हेकरांसह पुणे,अहमदनगर,मुंबईवरुन खास ढोलकीच्या तालावर आणि घुंगराच्या बोलावर रंगलेली लावणी पाहण्यासाठी रसिक व दर्दी प्रेक्षकांनी मोठ्या संख्येने गर्दी केली होती.श्री बेल्हेश्वर यात्रेच्या निमित्ताने भरणा-या तमाशा महोत्सवाचा दुसरा दिवस हा पुणेकर यांच्या लावणीमुळे चांगलाच बहरला होता.कार्यक्रमाची सुरूवात झाल्यावर पुणेकर यांच्या बैठकीच्या लावणीला त्यांनी केलेल्या मनमोहक अदाकारीला रसिकांनी भरभरुन प्रतिसाद दिला त्या प्रतिसादाला उचित साद देताना पुणेकर यांच्यासह त्यांच्या सहकलाकारांनी देखील एकापेक्षा एक सरस लावण्या सादर करुन प्रेक्षकांचे मनोरंजन केले तसेच या रावजी,तुम्ही बसा भावजी,पिकल्या पानाचा, झाल्या तिन्ही सांजा,कारभारी दमानं या व ईतरही एकापेक्षा एक बहारदार लावण्या सादर करुन कार्यक्रमाची रंगत वाढवत नेली.लावणीसोबत मराठी गीतांवरही नृत्य सादर करण्यात आले असून तब्बल तीन तास हा कार्यक्रम सुरू होता.विशेष म्हणजे यावेळी पुणेकरांच्या या लावणीच्या कार्यक्रमाला महिलावर्गाची उपस्थितीही डोळ्यात भरेल इतपत जाणवत होती.दोन दिवस चालणाऱ्या या तमाशा महोत्सवाचे नेटके आणि हजरजबाबी सूत्रसंचालन मनोज बेल्हेकर यांनी केले.
Comments
Post a Comment