वीजवितरण कर्मचा-याचे प्रसंगावधान,वीजेचा झटका बसलेल्या माकडाचे वाचविले प्राण.

बेल्हे(जुन्नरवार्ता सुधाकर सैद) भूतदया करा,प्राणीमात्रावर प्रेम करा अशी वाक्ये वाचायला फार आवडतात पण याचा प्रत्यक्ष अनुभव बेल्हे येथील वीजवितरणचे कर्मचारी वीजबील थकबाकी वसुलीसाठी गुळूंचवाडी(ता.जुन्नर)येथील ठाकरदरा येथे जात असताना त्यांना आला.सुरेश गुंजाळ व त्यांचे सहकारी  दुचाकीवरुन जात असताना अचानक एका वीजेच्या खांबावरुन एक माकड वीजेचा जोरदार झटका बसून खाली पडले व बेशुद्ध झाले त्यावेळी त्याला कर्मचारी सुरेश गुंजाळ यांनी प्रथमोपचार करताना जवळजवळ १०मिनिटे त्याच्या ह्रदयावर दाब देऊन त्याला जगविण्याचा प्रयत्न केला असता त्यांच्या प्रयत्नाला यश आले व माकडाने हालचाल करण्यास सुरुवात केली.या त्यांच्या प्रयत्नामुळे एका मुक्या प्राण्याला जीवदान मिळाले असून पाणी पिल्यानंतर सदर माकडाने धुम ठोकली व जंगलात पसार झाले.सुरेश गुंजाळ यांनी भूतदया व प्रसंगावधान दाखवून जे प्रयत्न केले त्याचे सर्वत्र कौतुक होत आहे.