बंद घर कोसळले,सुदैवाने जिवीत हानी नाही.

बेल्हे(जुन्नरवार्ता  सुधाकर सैद) येथील ब्राह्मणआळी भागातील गेली काही वर्षे बंद असलेल्या दुमजली घराचा पुढील भाग रविवारी रात्री ११वाजण्याच्या दरम्यान अचानक कोसळला असून या दुर्घटनेत सुदैवाने कोणतीही जिवीत हानी झाली नाही, मात्र बाजूच्या घराचे नुकसान झाले आहे.कै.मोहनलाल गांधी यांची ब्राह्मणआळी भागातील दुमजली इमारत असून ही इमारत जवळपास ७०/८० वर्षापूर्वी बांधलेली होती असे रायचंद गांधी यांनी सांगितले व सध्या या इमारतीत कोणीही राहत नसून गांधी कुटुंब आळेफाटा येथे राहात असल्याने सुदैवाने जिवीत हानी झाली नाही  मात्र या इमारतीच्या लगत राहणाऱ्या सेवानिवृत्त शिक्षिका मिनाक्षी लोंढे या त्यांच्या घराच्या पहिल्या मजल्यावर राहात असून त्यांच्या घराचेही काही प्रमाणात नुकसान झाले आहे. इमारतीचा विटा-मातीचा ढिगारा लोंढे यांच्या ओट्यावर पडल्याने त्यांचा जाण्या-येण्याचा रस्ता बंद झाला आहे.यावेळी भूकंपासारखा मोठा आवाज होऊन घर कोसळल्याने आजुबाजूच्या घरामध्ये राहणाऱ्या लोकांचा भितीने काळजाचा ठोकाच चुकला होता असे येथे राहणाऱ्या सामाजिक कार्यकर्त्या शाकीरा बेपारी यांनी सांगितले. यामुळे घटनेमुळे गावातील जुन्या इमारतींच्या सर्वेक्षणाची गरज निर्माण झाली असून एखादी अप्रिय घटना घडण्याअगोदरच ग्रामपंचायतीने वेळीच सावध होणे  गरजेचे आहे.