कृषी उत्पन्न बाजारसमितीचे माजी संचालक गजानन घोडे व ईतर पाच जणांवर गुन्हा दाखल,परिसरात खळबळ.

बेल्हे(जुन्नरवार्ता सुधाकर सैद) येथील कृषी उत्पन्न बाजार समितीचे माजी संचालक गजानन घोडे व ईतर पाच जणांवर आळेफाटा पोलीस ठाण्यात गुन्हा दाखल झाला असून याबाबतची आळेफाटा पोलीस सूत्रांकडून समजलेली माहीती अशी की शरद दत्तात्रय पिंगट (रा.बेल्हे) हे आपल्या शेतात काम करत होते,तसेच त्यांच्या लगतच गजानन घोडे याची शेतजमीन आहे. पुर्वीपासुन त्यांचे याच जमिनीच्या हद्दीवरून आपापसात    किरकोळ वादही झाले होते मात्र ते एवढे टोकाला गेले नव्हते मात्र यावेळेस गजानन घोडे यांनी याच वादाच्या कारणावरून वाद असलेल्या जागेत मुरूम टाकल्याने हा वाद आणखीच चिघळला व पर्यायाने या वादाचा परीणाम हाणामारीत झाला.यावेळी कृषी उत्पन्न बाजार समितीचे माजी सदस्य गजानन घोडे,निखील घोडे,तेजस घोडे,विलास पिंगट( रा.बेल्हे, ता.जुन्नर)अविनाश हाडवळे,पप्पू औटी(रा.राजुरी,ता.जुन्नर पुर्ण नाव माहीत नाही) या सहा जणांनी शरद दत्तात्रय पिंगट याना जबर मारहाण केली असून या मारहाणीत शरद पिंगट हे गंभीर जखमी झाल्याने त्यांना आळेफाटा येथील खाजगी रुग्णालयात उपचाराकरीता दाखल केले आहे. याबाबत आळेफाटा पोलीस ठाण्यात गुन्हा दाखल करण्यात आला असून संबधीत सहा आरोपी विरूद्ध  भा.द.वि. 326/324 /141/ 142/ 149 / 504 /506  अन्वये गुन्हा दाखल करण्यात आला असून आळेफाटा पोलीस ठाण्याचे पोलीस निरीक्षक मधुकर पवार यांच्या मार्गदर्शनाखाली पोलीस हवालदार विकास गोसावी हे पुढील तपास करत आहेत.कृषी उत्पन्न बाजारसमितीचे माजी संचालक गजानन घोडे यांच्यावर गुन्हा दाखल झाल्याने परिसरात खळबळ उडाली आहे.