बेल्हे(वार्ताहर) आळे (ता.जुन्नर) हद्दीतील लवणवाडी येथे विद्युत तारांचे घर्षण होऊन उडालेल्या ठिणग्यांमुळे लागलेल्या आगीत बारा एकर क्षेत्रातील ऊस जळाला आहे ही घटना शुक्रवारी ( दि १२) सकाळी साडेअकरा वाजण्याच्या सुमारास घडली असून याबाबतची अधिक माहिती अशी की लवणवाडी येथे ऊसाचे शेतातून गेलेल्या लोंबकळलेल्या विद्युत तारांमध्ये घर्षण होऊन उडालेल्या ठिणग्यांमुळे भागाजी दगडू कु-हाडे यांचे ऊसाला प्रथम आग लागली आणि पाहता पाहता ही आग पसरत गेली व शेजारील सुदाम सखाराम संभेराव, सुनिता सुदाम संभेराव, जगन्नाथ बबन कु-हाडे, दत्तात्रय दगडू कु-हाडे, कृष्णा दगडू कु-हाडे, प्रवीण केरभाऊ कु-हाडे यांच्याही ऊसाचे क्षेत्रात पसरली व शेवटी ही आग ग्रामपंचायत सदस्य मंगेश कु-हाडे यांचेही ऊसाला लागली मात्र ग्रामस्थांनी ही आग विझवल्याने पुढील पंधरा एकर ऊस वाचल्याचे फार मोठे नुकसान टळले.
या ठिकाणी असलेला हा ऊस तुटायला आला होता हा ऊस जळाल्याने येथील सर्व शेतक-यांचे मोठे आर्थिक नुकसान झाले असून,यापूर्वीही तीन वर्षापुर्वी अशीच घटना घडली होती. महावितरण कंपनीकडे येथील दोन खांबामधील तारांमध्ये पडलेला झोळ काढावा अशी विनंती वारंवार करूनही याकडे दुर्लक्ष केले जात असून महावितरण कंपनीने दुर्लक्ष केल्यानेच ही घटना घडल्याचे सदस्य मंगेश कु-हाडे यांनी सांगितले. आळेचे तलाठी, महावितरण कंपनीचे सहाय्यक अभियंता रोहित गांधी विघ्नहर कारखाना पिंपळवंडी कार्यालयाचे अधिकारी यांनीही घटनास्थळी भेटी दिल्या.
Comments
Post a Comment